Gettu betur – Írak 16.4.2007 Í tilefni þess að nýlega átti Íraksstríðið fjögurra ára afmæli hefur bandaríska tímaritið Mother Jones tekið sig til og sett stutta spurningakeppni um stríðið á heimasíðu sína. Í tilefni þess að bráðum koma kosningar á litla Íslandi verður hér stiklað á stóru í þessu skemmtilega og fræðandi quizzi, lesendum Múrsins til gagns og gamans.Nú um stundir eru u.þ.b. 141.000 bandarískir hermenn í Írak, og heil 125.000 af einkaverktökum eru jafnframt í vinnu þar. Af þeim hafa um 800 dáið í átökum síðan stríðið hófst. Stríðið kostar bandaríska skattgreiðendur 275 milljónir bandaríkjadala á hverjum degi. Ef innrásin hefði ekki verið gerð hefði það kostað um 23 milljónir á dag að halda Saddam Hussein í skefjum allt fram til ársins 2016. Uppreisnarmenn úr hópi Súnníta eru ábyrgir fyrir dauða næstum allra þeirra 3000 bandarísku hermanna sem látist hafa í átökum, þrátt fyrir yfirlýsingar Bandaríkjahers um að þessir uppreisnarmenn væru einungis nokkrir ólátabelgir sem auðvelt yrði að hafa hemil á. Andspyrnunni hefur þvert á móti stöðugt vaxið fiskur um hrygg og hernámsliðið virðist hálf getulaust gagnvart henni. Bandaríkjamenn hyggjast reisa nýtt, risastórt sendiráð í Bagdad og hefur ríkisstjórnin beðið þingið um 1,3 milljarða dollara til þess. Af starfsmönnum sendiráðsins eru heil þrjú prósent, eða sex manneskjur, sem tala arabísku. Af 275 þingmönnum íraska þingsins eru 153, eða um 55 %, Shítar. Heildarkostnaðurinn við stríðsreksturinn er nú um 318,5 milljarðar dollara. Sérfræðingar spá því að 44% hermanna muni þurfa á læknisaðstoð til langtíma að halda þegar fram líða stundir. Umönnun þeirra kemur til með að kosta 127 milljarða dollara til viðbótar. Aðeins helmingur bandarískra hermanna hefur trú á að Bandaríkjamönnum muni takast ætlunarverk sitt í Írak, og meira en þriðjungur þeirra telur að aldrei hefði átt að gera innrás fyrir það fyrsta. 1,8 milljónir Íraka hafa flúið land síðan átök hófust, og þar af eru 40% þeirra Íraka sem hafa einhverja sérfræðimenntun. Jórdanía hefur tekið á móti um 700.000 flóttamönnum, en Sádí-Arabía er nú að reisa 560 mílna langa girðingu til að halda flóttafólkinu úti. Bandaríkin tóku einungis á móti 202 flóttamönnum frá Írak árið 2006. Ef Írakar verða fyrir því óláni að vera sprengdir í tætlur af bandarískum eldflaugum greiða Bandaríkjamenn aðstandendum þeirra 2.500 dollara í sárabætur. Til samanburðar greiðir Bandaríkjastjórn 500.000 dollara eingreiðslu auk 40.000 dollara árlega til fjölskyldna óbreyttra hermanna sem látast í bardögum og skilja eftir sig ekkju með þrjú börn. Fjölskyldur bandarískra verktaka sem látast í bardögum fá 102.000 dollara. Og að lokum: Samkvæmt rannsókn sem Peter Bergen og Paul Cruickshank við New York University School of Law gerðu fyrir Mother Jones þá hafa hryðjuverkaárásir aukist, bæði í Írak og á heimsvísu, um að meðaltali heil 607% árlega, í kjölfar innrásarinnar. Það var og. Þetta er vissulega svört upptalning. En hvað um það. Maður ætti kannski bara að prísa sig sælan að vera yfirleitt spurður um eitthvað sem tengist Írak. Það er nefnilega ekki hefð fyrir því hér á landi að málefni Íraks séu borin undir mann. Írakshneykslið má ekki hverfa úr vitund fólks og allir ættu að vera þess minnugir þegar gengið er til kosninga þann 12. maí.
kpó
|
